शुभ्र चांदण्याची ही सुगंधीत रात्र आहे
त्या देखण्या चंद्रकोरीची उणीव मात्र आहे

जाणतो मी आता आली आहेस इथेच तू
ही वेल रातराणीची निमित्त मात्र आहे


डाग म्हणुनी याला हिणवू दे कुणालाही
तो तीळ गालावरचा प्रेमास पात्र आहे

गाऊ तुझ्याविना सांग कसा 'यमन' मी
त्या तीव्र मध्यमेची ऊणीव मात्र आहे.



Datta

हे ईश्वरा, मला रस्त्यातला दगड बनवू नकोस
कुणास ठेच लागण्यासाठी...
त्या पेक्षा राहीन घराच्या भिंतीत
कुणा गरीबाच्या निवाऱ्यासाठी...

हे ईश्वरा, मला पाण्याचा थेंब बनवू नकोस
अळवावर मिरविण्यासाठी...
त्या पेक्षा कामी येऊदे
एखाद्याची तहान शमविण्यासाठी...

हे ईश्वरा, मला नुसतंच फुल बनवू नकोस
बागेत शोभण्यासाठी...
त्या पेक्षा येईन तुझ्या पायाशी
एखाद्याच्या इच्छापूर्तीसाठी...

हे ईश्वरा, मला नुसताच शब्द बनवू नकोस
कुणाची उणीदुणी काढण्यासाठी...
त्या पेक्षा राहीन एखाद्या अभंगात
तुझे गुण गाण्यासाठी...................


Datta